„Það var ólýsanlega gaman að vakna í morgun, horfa framan í fólkið sitt og alla á förnum vegi í Vestmannaeyjum eftir að hafa tekið að þátt því að færa byggðarlaginu Íslandsmeistaratitilinn. Sjómannadagshelgin verður einstök í ár þegar saman fer fögnuður og heiður til handa sjómönnum og uppskeruhátíð í handboltanum!

Þetta var hörkuleikur, við þurftum að hafa mjög fyrir því að ná markmiðinu. Fyrst og fremst var þetta sigur liðsheildarinnar og ÍBV sem íþróttabandalags.“

Dagur Arnarson, leikstjórnandi nýkrýndra Íslandsmeistara ÍBV í handbolta og rekstrarstjóri hjá Iðunni Seafoods/VSV, er að vonum skýjum ofar í dag eftir frækilegan sigur í úrslitaleiknum við Hauka.

„Sigurinn var á ýmsan hátt sætari þegar þetta hafðist í fimmta leik, í hreinni úrslitarimmu. Við gátum auðvitað klárað þetta í þriðja leiknum en ég er ekkert feiminn við að viðurkenna eftir á að Eyjamenn fóru fram úr sér í aðdraganda þriðja leiksins og undanskil ekki okkur sjálfa í liðinu. Við fögnuðum of snemma, það þarf auðvitað að sigra í leiknum sjálfum áður en innistæða er fyrir fagnaðarlátum.

Við gátum klárað þetta með þremur sigrum í röð, eftir á að hyggja var algjör óþarfi að missa sig í yfirspennu í stað þess að komast aðeins fyrr í sumarfrí. Við fengum að launum geggjaðan fögnuð okkar fólks. Þessar stundir í úrslitakeppninni gleymast aldrei.

Það sem gerðist hjá okkur var mjög svipað því sem gerðist á Sauðárkróki í körfuboltanum á dögunum en sem betur fer hafðist þetta bæði þar og hér í Eyjum í gær. Ég skynja það afar sterkt að fólk á landsbyggðinni var með okkur og Sauðkrækingum í huganum í úrslitaleikjunum og fagnar sigri á báðum stöðum.

Við verðum að draga lærdóm af undirbúningi fyrir þriðja leikinn hjá okkur og munum örugglega gera það og sýna það í verk.“

Dagur hefur verið lengi að í meistaraflokki ÍBV og lætur ekki staðar numið.

„Núna fögnum við innilega en í júlí byrja æfingar á nýjan leik. Ég hef samið um að spila áfram næstu tvö árin. Talsverðar breytingar verða núna á liðinu en það er ekkert nýtt. Ég hef ekki tölu á öllum þeim leikmönnum sem hafa komið og farið frá okkur í atvinnumennsku eða tekið sér hlé undanfarin ár. Alltaf mallar samt ÍBV-vélin áfram.

Þetta tímabil mitt í meistaraflokki er númer 10 og ég bæti við tveimur í það minnsta. Það tekur á að sinna handboltanum, atvinnunni og fjölskyldunni samtímis en gengur, þökk sé atvinnurekendanum og auðvitað eiginkonunni og fjölskyldunni allri. Ég er afar þakklátur fyrir þann skilning sem mér er sýndur í vinnunni og heima fyrir. Tíminn sem fer í handboltann er ótrúlega mikill, meiri en margan grunar.

Ég er reyndar fjölskyldutengdur Vinnslustöðinni því Gústi rafvirki þar er afi minn, sjálfur er ég Eyjamaður í húð og hár.

Ég nota tækifærið til að senda Eyjamönnum kveðjur með innilegu þakklæti fyrir stuðninginn sem engin orð ná yfir. Sömuleiðis sendi ég sjómönnum sérstakar baráttukveðjur og hamingjuóskir í tilefni sjómannadagsins.“

• Óskar Pétur Friðriksson tók þessa frábæru myndir og þökk sé honum!