Vinnslustöðin hefur tekið á móti og veitt um 3.500 tonn af loðnu frá því vertíðin hófst. Þetta eru samanlagðar tölur aflans sem kominn var á land í gærkvöld (23. febrúar) og um borð í skip félagsins á miðunum. Mikill kraftur er á sama tíma í saltfiskvinnslu VSV.

Loðnan er stór og góð, hún er fryst fyrir Japansmarkað í nýja uppsjávarhúsinu. Stutt er á miðin, einungis fjögurra til fimm tíma sigling frá Eyjum.

Saltfiskvinnsla er fyrirferðarmikil í VSV nú eins og jafnan á þessum tíma ársins. Togbátarnir Drangavík VE og Gullberg VE héldu til veiða síðastliðið sunnudagskvöld og netabáturinn Brynjólfur VE á mánudagskvöld.

Aflinn hefur verið mjög góður, alls hefur verið landað liðlega 200 tonnum af þorski og ufsa frá því að verkfalli lauk. Þá hefur karfi og annar afli verið sendur utan og seldur á fiskmarkaði í Eyjum.

Nú sem fyrr er allt hráefni unnið í salt á meðan loðnuvertíð varir.