Rjómatertur á borðum í morgunkaffinu, svínasteik og blómvendir í hádeginu og veislufagnaður á veitingastaðnum Bangkok í Kópavogi í kvöld.

Þetta var ekkert venjulegur vinnudagur í Hólmaskeri, fiskvinnslufyrirtækinu í Hafnarfirði sem Vinnslustöðin á meirihluta í. Starfsmennirnir og tvíburabræðurnir Eiríkur og Tho fagna nefnilega fimmtugsafmæli í dag.

Þegar þeir slá saman tímamótunum verður úr heil öld. Menn  gera sér nú aldeilis dagamun af minna tilefni.

Eiginkonur beggja vinna líka í Hólmaskeri, Jampa og Mayuri, og í dag var þarna líka sonur annarra hjónanna (Eiríks og Jampa), Eiríkur yngri, við störf og sömuleiðis bróðursonur tvíburabræðranna. Þeir gerast varla fjölskylduvænni vinnustaðirnir á Íslandi, í bókstaflegum skilningi!

Tvíburinn Eiríkur eldri kom hingað til lands frá Tælandi 1990 og byrjaði til sjós á trillu frá Vopnafirði. Hann finnur enn fyrir grásleppufiðringi þegar vor er í lofti líkt og gerist um þessar mundir. Loksins, loksins vorar.  Systir hans bjó á Bakkafirði eystra. Þess vegna lá leiðin til Austfjarða.

Síðan flutti hann suður og fór að vinna í Frostfiski, hjá bræðrunum Steingrími og Þorgrími, sonum Leifs Halldórssonar aflaskipstjóra og útgerðarmanns í Ólafsvík. 

Hinn tvíburinn, Tho, kom til Íslands 1998 og fór að vinna í Frostfiski á Granda í Reykjavík og um hríð hjá sömu atvinnurekendum í Ólafsvík.

Báðir fluttu tvíburabræðurnir sig síðan til Þorlákshafnar þar sem þeir bjuggu og störfuðu um árabil, alltaf við að flaka ýsu fyrir Bandaríkjamarkað. Þeir eru fyrir löngu skráðir flökunarmeistarar á spjöld atvinnusögunnar, harðduglegir og samviskusamir. Þeir voru strax orðnir óþreyjufullir að komast inn í sal að flaka ýsu þegar þeim fannst hádegispásan lengjast óþægilega mikið vegna fagnaðarláta og afmælistilstands í dag!

Fagnaðarfundir urðu þegar bræðurnir Steingrímur og Þorgrímur birtust með blóm í tilefni dagsins og heilsuðu upp á afmælisbörnin og fjölskyldur þeirra. Sannkölluð hátíð í bæ.

Tvíburarnir búa núna með fjölskyldum sínum á höfuðborgarsvæðinu en í Þorlákshöfn á dóttir Tho, Anuthida Korshaia, enn heima. Sú mætti í Hafnarfjörð í dag til að fagna með sínu fólki. 

Tvíburabræðurnir eru í hópi alls 11 systkina. Þar af eru fimm búsett á Íslandi, það er að segja þeir tveir og þrjár systur þeirra. Frændgarðurinn allur er orðinn svo stór að hann gæti í sameiningu myndað stöndugt þorp, hvort heldur væri á Íslandi eða í Tælandi!

Hádegisstundin í Hólmaskeri var hlýleg og notaleg. Vinnustaðurinn býður af sér góðan þokka og andrúmsloftið eftir því . Tælendingarnir, sem eru íslenskir ríkisborgar og gegnheilir Íslendingar, eru gott dæmi um fólk sem flytur hingað og gerir gott þjóðfélag enn betra með því að auðga á sinn hátt menninguna, atvinnulífið og samfélagið yfirleitt.

Svo reyndust þessir landar vorir af tælenskum uppruna á einu máli um að íslenska sumarið væri mun geðslegra en það tælenska! Þar ytra væri bæði óþægilega heitt og rakt að sumarlagi en skaplegt hér.

Hvað eru svo innfæddir Íslendingar að kvarta yfir veðurfarinu hjá okkur?

• Vinnslustöðin tilkynnti seint á árinu 2021 að hún hefði keypt 75% hlutafjár í Hólmaskeri af hjónunum Alberti Erlusyni og Jóhönnu Steinunni Snorradóttur. Þau eiga áfram fjórðungshlut í Hólmaskeri og Albert er áfram framkvæmdastjóri félagsins.
• Í Hólmaskeri er flökuð ýsa og send á markað á austurströnd Bandaríkjanna.
• Með þessu skrefi stuðlar Vinnslustöðin að því að efla fiskvinnslu á Íslandi og auka verðmæti þess sem sjávarauðlindin gefur af sér.

Albert framkvæmdastjóri talaði við starfsmenn í upphafi hádegishlésins og óskaði tviburunum til hamingju með daginn. Tho er rauðklæddur með gleraugu á myndunum en Eiríkur grænklæddur og gleraugnalaus!