„Við erum afar ánægð, margir gestir og básinn okkar vel sóttur,“ segir Björn Matthíasson, rekstrarstjóri About fish, um alþjóðlegu sjávarútvegssýninguna í Brüssel sem lýkur í dag.

„Síðasta sýning í Brüssel var í skugga hryðjuverkaárásarinnar á flugvellinum í borginni og var illa sótt af þeirri ástæðu. Sýningin nú er hins vegar fjölsótt og hefur tekist vel í alla staði.“

Þetta er risasamkoma með um 1.800 sýnendur frá 79 ríkjum, haldin í 24. sinn. Hún hófst á þriðjudaginn og henni lýkur síðdegis í dag, fimmtudag.

Fulltrúar allra About fish, sölu- og markaðsfélaga Vinnslustöðvarinnar, voru á sýningunni til að hitta viðskiptavini og plægja akur vegna nýrra viðskipta. Björn er rekstrarstjóri About fish.

„Sýningin er auðvitað mikilvægt tækifæri fyrir okkur í About fish til að hittast og bera saman bækur okkar. Við miðum við að koma saman tvisvar á ári, allur hópurinn.

Í öðru lagi hittum við hér flesta núverandi viðskiptavini okkar víðs vegar um álfur og það skiptir máli fyrir þá að við séum til staðar og fyrir okkur að rækta samböndin.

Í þriðja lagi kynnumst við alltaf nýju fólki og eygjum nýja möguleika til viðskipta. Þegar Rússar settu á viðskiptabann um árið var sýningin í Brüssel til dæmis upplagður vettvangur til að skyggnast um eftir nýjum mörkuðum fyrir makríl.

Við fengum margt fólk í básinn okkar og nýtt kynningarmyndband, sem Sighvatur Jónsson setti saman í aðdraganda sýningarinnar, gerði sig vel. Þar og í annarri kynningu VSV hér er því haldið vel á lofti sem við erum að gera í Eyjum, einkum beinum við sjónum manna að nýja uppsjávarfrystihúsinu.

Í kynningarmyndbandinu eru mörg „skot“ úr uppsjávarhúsinu og þau gripu auga gesta á gangi um svæðið. Þeir stöldruðu við og úr var oft frekara spjall. Myndbandið vakti því eftirtekt, eins og því var auðvitað ætlað að gera.“