Árið 2020 er árið sem allir munu muna eftir. Árið sem heimurinn breyttist í einu vetfangi með COVID 19 farsóttinni.

• Við urðum að breyta öllu okkar háttarlagi og verklagi til lands og sjávar nánast á einni nóttu.
• Við hittum viðskiptavini okkar og skipulögðum sölustarfsemi á fjarfundum.
• Við tókum sjaldan á móti gestum og lokuðum okkur af eins og við gátum.
• Við báðum starfsfólk okkar að fara varlega í samskipum við aðra, bæði á vinnustað og utan vinnustaðar.
• Við settum varúðarreglur í fyrirtækinu og ástunduðum sóttvarnir í meira mæli en dæmi eru um áður.

Þetta hefur verið á köflum erfiður tími og ekki skemmtilegur. Nú við áramót getum við hins vegar litið um öxl og sagt með stolti við okkur sjálf og aðra: Við uppskárum laun erfiðisins, okkur tókst þetta allt saman!

• Við héldum veirufaraldrinum frá Vinnslustöðinni og misstum ekki úr einn dag í sjósókn og við framleiðslu, þökk sé sjómönnum, fiskvinnslufólki í landi, öðrum starfsmönnum og stjórnendum.
• Við héldum gangandi sölustarfsemi, héldum tengslum við viðskiptavini og hnökralitlu flæði afurða og afhendinga, þökk sé sölumönnum félagsins um allan heim og starfsfólkinu hér heima.
• Við gátum látið hlutina ganga í krafti frábærrar samstöðu alls starfsfólks og góðra og traustra viðskiptasambanda.

Þegar nú er runninn upp 30. desember, næstsíðasti dagur ársins, get ég upplýst að rekstur Vinnslustöðvarinnar var með miklum ágætum á árinu 2020 þrátt fyrir heimsfaraldurinn, þrátt fyrir loðnubrest og humarleysi og þrátt fyrir erfiðar aðstæður á mörkuðum.

Öll él birtir upp um síðir. Við munum sigrast á COVID og líf færist í eðlilegar skorður en það tekur sinn tíma. Baráttunni er ekki lokið, verum áfram á verði en fjöldabólusetning á landinu vekur vonir og bjartsýni.

Við höfum búið við mótlæti og áður óþekktar aðstæður mestallt árið sem nú er senn á enda runnið en skulum leyfa okkur líka að hugsa með þökkum og virðingu til fyrri kynslóða Íslendinga sem glímdu fyrir liðlega einni öld samtímis við afleiðingar heimsfaraldurs drepsóttar, eldgoss í Kötlu og dæmalausrar vetrarhörku frostavetrarins mikla en þraukuðu af þetta erfiðleikaskeið sem ekki einu sinni er hægt að ímynda sér hvernig hafi verið í raun.

Fyrr á árinu sendi Gunnar Þór Bjarnason frá sér bók um Spænsku veikina og dregur þar upp hrollvekjandi myndir af faraldrinum á Íslandi, þar á meðal í Vestmannaeyjum. Þegar ekki hafði náðst símasamband við Eyjar samfleytt í fimm daga í nóvember 1918 var ákveðið í Stjórnarráðinu í  Reykjavík að senda hingað varðskip til að kanna aðstæður. Þá kom í ljós að þrír af hverjum fjórum Eyjamanna voru veikir, þar á meðal allt starfsfólk símstöðvarinnar.

Frá 14. nóvember til 6. desember 1918 létust 24 úr Spænsku veikinni í Vestmannaeyjum en til samanburðar má geta þess að á Íslandi hafa nú látist alls 29 manns af völdum COVID frá því fyrsta smit greindist hérlendis í febrúar 2020 til dagsins í dag, 30. desember.

Allt samkomuhald í Vestmannaeyjum lá niðri vikum saman síðla árs 1918, að jarðarförum undanskildum. Þær voru nær daglega frá upphafi aðventu til jóla.

Þeir sem glímdu við þessar ótrúlegu hörmungar þá hefðu því tæplega talið það til erfiðleika sem við nú rifjum upp frá árinu 2020!

Ástæða er til bjartsýni við upphaf árs 2021. Við skulum ganga til nýs árs vongóð um að Íslendingar og þjóðir heimsins sigrist á veirunni.

Nú reynir á úthald og þolinmæði Íslendinga og þar með okkar líka í Vinnslustöðinni. Öllu skiptir að gefa nú ekkert eftir og starfa áfram í anda agaðs skipulags og sóttvarna í fyrirtækinu, að halda út og búa sig undir gjöfula loðnuvertíð og góða vetrarvertíð.

Slaka með öðrum orðum hvergi á fyrr en óhætt er þegar svo stór hluti þjóðarinnar hefur verið bólusettur að náðst hefur að mynda hjarðónæmi gagnvart COVID.

Við skulum spyrja að leikslokum og fagna þá en notum tækifærið núna um áramót til að staðfesta að við siglum vel og árangursríkt í mótbyrnum. Við skulum hvetja okkur sjálf til dáða áfram þar til veiran játar sig sigraða.

Árið 2020 var ár starfsmanna okkar og viðskiptavina. Ég þakka þeim innilega fyrir framlag sitt og dugnað og óska þeim og Vestmannaeyingum öllum gleðilegs og farsæls nýs ár.

Sigurgeir B. Kristgeirsson

framkvæmdastjóri

Litið í myndaalbúm

Við lok þessa „árs starfsmanna“ er ástæða til að birta hér alls 17 myndir sem Hreinn Magnússon ljósmyndari tók af starfsmönnum VSV við karfavinnslu í júlí 2020. Nöfn fyrirsætanna í réttri röð koma á eftir síðustu mynd hér fyrir neðan.