Vinnslustöðin sækir nú sjávarútvegssýninguna í Qingdao, Kína sem haldin er í Hongdao International Convention and Expo Center í Qingdao og hófst í dag. 

„Markmiðið er að styrkja þau bönd sem nú þegar eru fyrir í Asíu og hitta okkar helstu viðskiptavini sem sækja sýninguna ásamt því að kynna afurðir okkar fyrir áhugasömum kaupendum,“ segir Björn Matthíasson rekstrarstjóri VSV Seafood Iceland sem staddur er á sýningunni. 

Mikill áhugi er á íslensku sjávarfangi sem áður og hefur enginn markaður stækkað eins hratt á síðustu árum en Kína og hefur nú neyslan náð yfir 34 kg á hvern íbúa. Kína er nú orðinn annað stærsta innflutningsland í heiminum á sjávarafurðum og stækkar enn.

Kína er mikilvægur markaður fyrir Íslendinga fyrir loðnu og loðnuhrogn og setur það óneitanlega strik í reikninginn að geta ekki sagt til með vissu hvort við eigum vona á útgefnum kvóta fyrir komandi vertíð. Fulltrúar Vinnslustöðvarinnar standa vaktina næstu daga á sýningarsvæðinu og hlakka til að taka samtalið.